Заменик-министерот за надворешни работи на Иран, Саид Хатибзаде, изјави дека Ормутскиот теснец ќе биде повторно отворен само откако САД „вистински ќе ја повлечат својата агресија“.
Во интервју за програмата „Тудеј“ на Би-Би-Си, тој рече дека Иран ќе „обезбеди безбедност на пловидбата“, истакнувајќи дека морскиот премин бил „отворен за илјадници“ до почетокот на сегашниот конфликт.
Во исто време, тој нагласи дека Иран има намера да дејствува во согласност со меѓународното право, но исто така потврди дека Ормутскиот теснец не е во меѓународни води и дека безбедното поминување зависи од „добрата волја на Иран и Оман“.
Кога беше прашан дали ова значи дека Иран нема да наплаќа за премин на бродови ниту ќе им се заканува, тој одговори дека Техеран сака теснецот да биде „мирен“, но дека безбедноста на пловидбата е „двонасочна“ и дека нема да дозволи Персискиот Залив да се користи за воени активности.
Иран им порача на САД: „Мора да изберете помеѓу војна и примирје“
Соединетите Американски Држави „мора да изберат“ помеѓу војна и примирје, рече тој, нагласувајќи дека двата пристапа не се компатибилни.
„Не можам да ги имаме и двете истовремено. Тие меѓусебно се исклучуваат, тоа е сосема јасно“, вели тој.
Тој, исто така, повтори дека Иран ги смета израелските напади врз Либан за „тешко кршење“ на прекинот на огнот меѓу САД и Иран.
Тој додаде дека Техеран очекува сите земји на Блискиот Исток да го почитуваат договорот, вклучително и американските сојузници.
„Ги молиме сите на Блискиот Исток да се придржуваат кон овој договор… и очекуваме Американците да го сторат истото со своите сојузници“, рече тој.
Кога беше прашан дали Иран ќе се откаже од преговорите ако продолжат израелските напади, Хатибзаде не одговори директно, но истакна дека фокусот на Иран е на „благосостојбата на целиот Блиски Исток“.
Техеран: Ние го поддржуваме Хезболах, но не ги контролираме неговите активности
Хатибзаде рече дека Иран ги повикува сите актери на Блискиот Исток да го почитуваат примирјето постигнато со Соединетите Американски Држави, но тој ја бранеше улогата на Хезболах.
Кога новинар на Би-Би-Си го праша дали ова значи дека Иран ќе побара од Хезболах да ги запре ракетните напади врз Израел од Либан, Хатибзаде одговори дека тоа е „чисто либанско движење на отпорот“.
Во исто време, тој не негираше дека Иран ѝ дава поддршка на таа група.
„Не го негирам тоа“, рече тој, додавајќи дека „не е тајна“ дека Иран го поддржува тоа „движење на слобода и отпор“, но тврди дека Хезболах „не дејствува во име на Иран“.
Тој исто така нагласи дека договорот меѓу САД и Иран предвидува двете страни, заедно со нивните сојузници, да го прифатат примирјето од моментот на неговото стапување во сила.