Руската федерална служба за безбедност (ФСБ) притвори поранешен новинар на Радио Слободна Европа под обвинение за предавство, објави државната новинска агенција ТАСС во четврток. Новинарот, чие име не е објавено, е уапсен во градот Чита, пишува Ројтерс.
Обвинет за соработка со украинската служба
ФСБ го обвинува човекот за соработка со украинската разузнавачка служба СБУ, на која, како што тврдат, тој дал информации преку апликацијата за пораки Телеграм.
Киев сè уште не објавил ништо за овој случај.
Од почетокот на инвазијата на Украина, Русија значително го заостри законодавството поврзано со предавство и шпионажа, а бројот на вакви случаи нагло се зголеми.
Властите сè повеќе ги обвинуваат граѓаните, новинарите и активистите за соработка со украински или западни служби, честопати врз основа на комуникација преку интернет или социјални мрежи.
Во исто време, меѓународните организации за заштита на новинарите предупредуваат дека обвинувањата за предавство се користат и како алатка за задушување на независните медиуми и критичките гласови.
Радио Слободна Европа, за кое уапсениот новинар работеше како фриленсер, веќе е прогласено за „странски агент“ во Русија, а неговите активности се значително ограничени.