Како што се приближува рокот поставен од американскиот претседател Доналд Трамп за Иран, дипломатската активност брзо се интензивира, предупредува главниот меѓународен дописник на Би-Би-Си, Лиз Дусет.
Иако, како што наведува, е примамливо да се игнорира воинствената реторика на Трамп, тоа е премногу опасно, истакнува тој.
За потсетување, американскиот претседател вчера напиша на својата платформа Truth Social:
„Вторник е Ден на електраните и Ден на мостовите во Иран, сè во едно. Вакво нешто досега не е видено!!! Отворете го тој е*ен теснец, луди копилиња, или ќе живеете во пекол – САМО ГЛЕДАЈТЕ! Слава му на Бога. Претседател ДОНАЛД Џ. ТРАМП.“
Закани што можат да ја прошират војната
Доколку Трамп ги оствари своите закани дека Иран „нема да има ниту еден мост или електрана“, Израел дополнително би ги зголемил нападите врз инфраструктурата, додека Иран веќе се закани дека ќе возврати на државите во Персискиот Залив.
Таквиот развој на настаните би можел значително да го прошири конфликтот и дополнително да го дестабилизира регионот.
Забрзана дипломатска иницијатива
Во меѓувреме, како што се приближува рокот, дипломатските напори влегуваат во завршна фаза.
Ројтерс, повикувајќи се на неименувани извори, известува дека медијаторите работат на нов план во кој Пакистан игра важна улога, со цел да ги повлече САД од работ на ескалација.
Аксиос, исто така, известува за обиди за постигнување примирје и движење кон траен крај на војната.
Кој прв ќе попушти?
Не е јасно како Иран гледа на овие предлози, бидејќи постојано повторува дека нема да се согласи со условите што ги смета за ултиматум или диктат.
Клучното прашање, заклучува Би-Би-Си, е дали ќе биде доволно Трамп повторно да ги отфрли заканите, како што направи на крајот на март, и да остави простор за дипломатија.