Претседателот на Соединетите Американски Држави, Доналд Трамп, во петокот потпиша извршна наредба со која се укинува „казнената“ царина од 25 отсто за целиот увоз од Индија, воведена поради индиското купување руска нафта, објави Белата куќа.
Одлуката, пренесува Ројтерс, уследи откако Трамп на почетокот на неделата објави дека е постигнат трговски договор со Индија, според кој американските царини за индиски стоки се намалени од 50 на 18 отсто, во замена за прекин на индискиот увоз на руска нафта и намалување на трговските бариери.
Индија е во голема мера зависна од увоз на енергија, а околу 90 отсто од нејзините потреби за нафта се задоволуваат од странство.
Купувањето поевтина руска нафта му овозможи на Њу Делхи да ги намали увозните трошоци откако Москва ја нападна Украина во 2022 година, а западните земји воведоа санкции за енергетскиот сектор на Русија.
Според извештајот на Ројтерс, Индија неодамна почна да го забавува купувањето на руска нафта.
Во текот на јануари увозот изнесуваше околу 1,2 милиони барели дневно, додека се проценува дека во февруари ќе се намали на околу 1 милион барели дневно, а во март на приближно 800.000 барели дневно.
Договорот со Индија е дел од пошироката трговска стратегија на администрацијата на Трамп, која има за цел да ја намали зависноста на глобалниот пазар од руската енергија и да ги зајакне билатералните трговски односи со клучните партнери.