Маж кој „ги таргетирал“ децата на социјалните медиуми и платформите за игри е обвинет за стотици прекршоци за сексуална злоупотреба на деца против 459 жртви во Австралија и 15 други земји, соопшти полицијата во Квинсленд.
27-годишникот, кој е во притвор од минатиот февруари, е обвинет за 596 прекршоци откако полицијата пронашла повеќе од 23.000 видеа и фотографии од наводна злоупотреба на неговите електронски уреди, објавува Би-Би-Си.
– Обемот на фотографии и видео материјал значеше дека процесот на идентификација бара време, вештина и посветеност – рече детективот Дензил Кларк од полицијата на Квинсленд.
Досега се идентификувани вкупно 360 жртви, а истрагата е сè уште во тек, додаде тој.
Повеќе од 200 жртви биле во Австралија, додека останатите биле од странство, претежно од земји што зборуваат англиски јазик, соопшти полицијата.
Повеќето од нив биле момчиња на возраст меѓу седум и 15 години.
– Полицијата сè уште работи со меѓународни партнери за идентификување на жртвите – рече Кларк.
Тој предупреди за „зголемената инциденца на деца кои се регрутирани, принудени или уценувани да прават и испраќаат сексуални фотографии од себе, честопати преку популарни апликации, игри и социјални мрежи“.
Во разговор со новинарите, Кларк одби да ги именува страниците што ги користел човекот, но рече дека тие се многу популарни.
Сите злосторства биле извршени преку интернет, а други осомничени се истражуваат.
Мажот наводно ги таргетирал децата помеѓу 2018 и 2025 година, создавајќи повеќе онлајн профили и претставувајќи се и како мажи и како жени, соопшти полицијата.