Украинскиот претседател Володимир Зеленски денес изјави дека екипите за поправка целосно го вратиле енергетскиот систем во состојбата во која бил пред техничкиот дефект што се случи пред два дена и дека системот работи стабилно.
„Со оглед на екстремно студеното време и влијанието на руските напади, сите предизвици остануваат сериозни. Во изминатите 24 часа имаше нови руски напади врз енергетски објекти во заедниците во близина на фронтот или границата (со Русија). Во исто време, немаше целни напади од руски ракети или проектили врз енергетската инфраструктура“, рече Зеленски во објава на Платформа X.
Тој додаде дека, „како и во претходните денови, руската армија останува фокусирана на терор“ против украинската логистика, првенствено железничката инфраструктура.
„Поточно, имаше напади во областа Днепар и во Запорожје, особено насочени кон железничките објекти“, истакна Зеленски.
Според него, повеќе од 200 згради во Киев сè уште се без греење, а се вршат поправки.
„Му дадов инструкции на Министерството за внатрешни работи на Украина, како и на локалните администрации, да ја проверат работата на сите точки за помош и греење низ цела Украина. Без оглед на тоа колку активно се користеа овие точки во последните денови, тие мора да бидат целосно подготвени во текот на студениот бран за каков било можен развој на настаните“, рече Зеленски.
Тој додаде дека регионалните власти се задолжени и за проверка на сите телекомуникациски базни станици.
„Според податоците од Министерството за внатрешни работи, една од десет станици не функционира за време на прекин на електричната енергија, особено често во руралните средини. Комуникациите мора да бидат стабилни“, рече Зеленски.
Зеленски, исто така, рече дека ситуацијата со прекините во снабдувањето со електрична енергија останува тешка во Кропивнички и регионот, Полтавската област, Днепарската област, Черкаската област, како и во населбите по должината на границата со Русија, пренесува Танјуг.