Рускиот претседател Владимир Путин редовно добива директни извештаи од руските претставници во мировните преговори за Украина, но Кремљ нема јавно да дискутира за поединечни одредби од преговарачкиот процес на формулата Анкориџ, изјави денес портпаролот на Кремљ, Дмитриј Песков.
„Би било погрешно сега да се дискутираат специфичните аспекти на прашањата што се на дневен ред, особено во јавен формат. Не е тајна, и тоа е наш конзистентен став, став на нашиот претседател, дека територијалното прашање, кое е дел од формулата Анкориџ, е секако од фундаментално значење за руската страна. И нашите преговарачи продолжуваат да ги претставуваат тие интереси“, изјави Песков за новинарите, пренесува РИА Новости.
Руската страна често ја споменува „формулата Анкориџ“, односно договорот постигнат на средбата меѓу Путин и американскиот претседател Доналд Трамп за време на нивната средба во Алјаска во август 2025 година, без да даде детали за тоа на што се однесува формулата.
Песков рече дека го поздравува самиот почеток на конструктивните преговори.
„Самиот факт дека овие контакти започнаа на конструктивен начин може да се оцени позитивно“, рече Песков.
Според него, продолжувањето на преговорите, кои се одржаа минатиот викенд во Абу Даби, е планирано за следната недела.
„Не можам да ви дадам прецизен датум засега“, рече Песков.
Тој рече дека Путин во моментов нема закажани контакти со Трамп, но дека таков разговор би можел брзо да се организира.
„Во моментов, таков разговор не е на распоред, но се координира многу брзо. Постоечките комуникациски канали, каналите за дијалог со американската страна, ни овозможуваат ефикасно да ги координираме билатералните контакти на највисоко ниво веднаш“, истакна Песков.
Портпаролот на Кремљ процени дека евентуалните американски напади врз Иран би значеле сериозна дестабилизација во регионот и дека „тоа би бил уште еден чекор што би можел сериозно да ја дестабилизира ситуацијата во регионот“ и дека „Русија продолжува да вложува напори за олеснување на деескалацијата“.
Песков, исто така, рече дека соработката со Русија останува приоритет за Венецуела и дека Москва е во постојан контакт со Каракас преку дипломатски канали.
„А за Венецуела, судејќи според она што го слушаме од Каракас, продолжувањето на развојот на меѓусебно корисни односи со Русија е приоритет“, истакна Песков.