Некои членови на Републиканската партија во САД јавно ја изразија својата резервираност за можна воена интервенција во Венецуела и соборување на претседателот Николас Мадуро, предупредувајќи дека таквата одлука може да има далекусежни и негативни последици за американските интереси, пишува весникот The Hill.
Според овој медиум, некои републикански сенатори генерално го поддржуваат построгиот пристап на администрацијата на претседателот Доналд Трамп во борбата против шверцот со дрога и организираниот криминал во регионот, но истовремено предупредуваат дека евентуалните „директни воени напади“ би можеле да претставуваат опасно преминување на црвената линија.
Сенаторот Роџер Маршал истакна дека е неопходна екстремна претпазливост кога станува збор за таканаречената „промена на режимот“, нагласувајќи дека слични интервенции во минатото често давале спротивни ефекти од очекуваното.
Сличен став искажува и сенаторот Ренд Пол, кој отворено се противи на каква било воена интервенција во Венецуела.
Еден од републиканските сенатори, кој остана анонимен, отиде чекор понатаму, тврдејќи дека намерата на администрацијата во Вашингтон е директно насочена кон соборување на венецуелскиот претседател.
„Не сакам распоредување на копнени трупи во Венецуела. Не сакам повторување на сценариото од Авганистан или Ирак. Не поддржувам промена на режимот по налог на САД“, изјави овој сенатор.
За потсетување, на 17 декември, претседателот Трамп објави „целосна и сеопфатна блокада“ на сите санкционирани нафтени танкери што пловат кон и од Венецуела.
Во исто време, тој ја означи венецуелската влада како терористичка организација, обвинувајќи ја за „крадење“ на американски имот, тероризам, шверц на дрога и трговија со луѓе.
Официјален Каракас ги отфрли овие обвинувања, нагласувајќи дека Венецуела „никогаш повеќе нема да биде колонија на ниту една империја“, со порака дека ќе продолжи да го брани својот суверенитет и независност.