Јапонија издаде предупредување за мегаземјотрес откако земјотрес со јачина од 7,5 степени го погоди источниот брег на Аомори, најсеверната префектура на главниот остров Хоншу во Јапонија, во понеделник.
Службениците изјавија дека шансата за земјотрес поголем од 8 степени е само еден процент, но се надеваат дека предупредувањето ќе обезбеди јавноста да биде подготвена во случај на силен земјотрес што би можел да предизвика уништување како катастрофата во 2011 година во која загинаа речиси 20.000 луѓе.
Беше истакнато дека постои зголемен ризик од земјотрес од 8 степени, поради што беше испратен апел до населението да биде подготвено.
Јужниот пацифички брег на Јапонија доби „предупредување за мегаземјотрес од Нанкаи“ во летото 2024 година, но нејасната формулација на предупредувањето доведе до панично купување на прехранбени производи, откажување на настани и затворање на бизниси.
Јапонската метеоролошка агенција (JMA) соопшти дека силниот земјотрес од понеделник привремено го зголемил ризикот во регионот Хокаидо и по должината на брегот Санрику.
Во тие области, Тихоокеанската плоча под Јапонија формира два рова – Јапонскиот ров и Чишимскиот ров – кои предизвикале многу големи земјотреси во минатото.
Експертите велат дека смртоносниот земјотрес и цунамито од 2011 година предизвикале поместување по должината на Јапонскиот ров.
Тој ров се протега од брегот на префектурата Чиба до Аомори, додека Чишимскиот ров се протега од источниот брег на Хокаидо па сè до северните острови и Курилските Острови.
Објаснувајќи го новото предупредување, JMA потсети дека земјотресот со магнитуда од 9,0 степени во 2011 година се случил два дена по земјотресот со магнитуда од 7,3 степени што го погоди подрачјето на Јапонскиот ров покрај брегот на префектурата Ивате, еден од најтешко погодените региони и во таа катастрофа и во земјотресот од понеделник.
Земјотресот од 2011 година предизвика цунами што ги погоди крајбрежните градови во префектурите Ивате, Мијаги и Фукушима. Цунамито, кое достигна висина од 15 метри во некои области, ја оштети нуклеарната централа Фукушима Даичи.
Според владините проценки, нов мегаземотрес покрај брегот на областа Хокаидо-Санрику би можел да предизвика цунами до 30 метри висок, да убие до 199.000 луѓе, да уништи до 220.000 куќи и згради и да предизвика економска штета до 31 трилион јени (198 милијарди долари).
Областите опфатени со предупредувањето се протегаат низ 182 општини – од Хокаидо до префектурата Чиба.
Службениците нагласуваат дека најновото предупредување не предвидува кога или каде би можел да се случи мегаземотрес.
Жителите се поканети да бидат внимателни и подготвени, но и да продолжат со својот секојдневен живот и работа.
Им беше советувано да имаат торба за итни случаи со залихи за неколку дена, заедно со чевли и шлем.
Жителите треба да се договорат за план за евакуација со членовите на семејството и да спијат во дневна облека, а не во пижами, за да бидат подготвени веднаш да избегаат.
Исто така, се препорачува мебелот да се прицврсти на подот или ѕидовите.
Предупредувањето за мегаземоземјотрес во Јапонија издадено минатата година содржеше многу научна формулација, што збуни и загрижи многу жители.
Некои градови затворија плажи и откажаа годишни настани, разочарувајќи многу туристи за време на будистичките празници.
Многу луѓе ги одложија планираните патувања и брзаа да купат ориз, сушени тестенини, флаширана вода и преносни тоалети, оставајќи ги полиците на супермаркетите празни во западна Јапонија, па дури и во Токио, кое не беше означено како ризична зона.