Генералниот секретар на НАТО, Марк Руте, и романскиот претседател Никушор Дан, изјавија дека повлекувањето на дел од американските трупи од таа земја нема да ги ослаби одбранбените капацитети на Романија или на источното крило на Алијансата.
За време на неговата посета на Букурешт, Руте изјави дека „прилагодувањата на распоредувањето на американската војска се вообичаени“ и дека Вашингтон останува цврсто посветен на одбраната на своите сојузници во Источна Европа, пренесува Euronews.
„Дури и со оваа промена, американското воено присуство во Европа е поголемо отколку што беше пред години. Мислам дека му даваме премногу значење на ова повлекување“, рече Руте на заедничката прес-конференција со романскиот претседател.
Соединетите Американски Држави минатата недела објавија дека ќе ја повлечат ротирачката бригада стационирана во Романија, без планови за нејзина замена, велејќи дека тоа е „позитивен знак за зголемени европски капацитети и одговорност“.
Руте повтори дека Алијансата ги има сите планови подготвени за одбрана на земјите од првата линија, вклучително и операцијата Источна гарда, започната кон средината на септември како одговор на нападите со беспилотни летала во неколку земји-членки.
„Постојат јасни планови за одбрана на секој сантиметар од сојузничката територија“, нагласи тој.
Романскиот претседател Никушор Дан, исто така, изјави дека „нема загриженост“ во врска со повлекувањето на американските трупи.
„Операцијата „Источна стража“ и воената вежба што се спроведува сега се доказ дека успешно ги координираме големите движења на вооружените сили“, рече романскиот претседател.
Според агендата на посетата, двајцата претставници ќе разговараат за безбедносните предизвици со кои се соочува НАТО, особено на источното крило, како и за зајакнување на безбедносните и колективните одбранбени капацитети на Романија, објави „Еуроњуз Романија“.
Шефот на НАТО рече дека Романија не е само сојузник што придонесува за безбедноста на Алијансата, туку и нејзин директен корисник.
„Романија е вреден сојузник. Ја зајакнавме одбранбената позиција на источното крило, а Романија има клучна улога во регионот на Црното Море“, нагласи Руте.