Американскиот претседател Доналд Трамп изјави дека европските лидери го нарекуваат „претседател на Европа“, тврдејќи дека неговото влијание врз одлуките во Брисел станало одлучувачко, објавува „Политико“.
Иако претставниците на ЕУ негираат дека користат таква формулација, тие признаваат дека улогата на Вашингтон во обликувањето на европската политика достигнала невидени размери.
Според изворите, лидерите на Европската Унија не само што му се обраќаат на Трамп во контекст на односите со Русија, туку и го замолиле да посредува во убедувањето на унгарскиот премиер Виктор Орбан за одредени прашања.
Еден европски дипломат рече дека Трамп веројатно никогаш формално нема да стане „претседател на Европа“, туку дека би можел да ја добие улогата на „кум“ на Стариот континент.
Поранешниот амбасадор на САД во ЕУ, Ентони Гарднер, потсети дека за време на преговорите за Трансатлантското трговско и инвестициско партнерство, Вашингтон се однесувал кон Европа како кон рамноправен партнер.
Денес, меѓутоа, оцени тој, ЕУ ја изгубила својата солидарност и со тоа станала поподложна на притисок од американската администрација.
Европската Унија претходно го критикуваше Трамп за неговите изјави за територијалниот интегритет на Украина, што дополнително ги зголеми тензиите во трансатлантските односи.