Службите за итни случаи беа повикани поради експлозија во магацин во индустриската зона Граундвел во Свиндон, Велика Британија, соопшти полицијата во Вилтшир.
Полицијата, пожарникарите и тимовите за итни случаи беа повикани на местото на настанот синоќа околу 19:30 часот, по што започнаа со евакуација на областа, објавува денес Скај њуз.
Тие ги повикаа жителите во областа да останат во затворен простор, да ги затворат прозорците и да ја избегнуваат индустриската зона од безбедносни причини.
Според Противпожарната и спасувачка служба на Дорсет и Вилтшир, најмалку десет противпожарни возила и специјализирана опрема се на местото на настанот за да го изгаснат големиот пожар во магацинот.
Локалните жители објавија на социјалните мрежи дека ја почувствувале експлозијата и потресите во своите домови, опишувајќи „огромна огнена топка“ над магацинот.
Засега нема официјални информации за повредените.