Францускиот претседател Емануел Макрон синоќа, обраќајќи се пред Генералното собрание на Обединетите нации во Њујорк, објави дека Франција официјално ја признава Државата Палестина.
„Верен на историската посветеност на мојата земја кон Блискиот Исток… Франција денес ја признава Државата Палестина“, рече Макрон во понеделник.
Тој изјави дека ова признавање не е против Израел, туку „пораз за Хамас, антисемитизмот и антиционизмот“ и го отвора патот за „корисни преговори“, пренесува Фигаро.
„Ова признание го отвора патот за корисни преговори… Тоа носи амбиција за прекинување на циклусот на насилство“, рече францускиот претседател, пренесува Танјуг.
Макрон остро го осуди продолжувањето на израелските воени операции во Газа.
„Ништо повеќе не ја оправдува војната во Газа. Мора да ги спасиме сите животи. Од 7 октомври сме сведоци на негирање на вредноста на човечкиот живот. А секој живот е подеднакво вреден“, нагласи Макрон.
Тој повика ослободувањето на 48-те заложници да биде поврзано со прекинот на операциите во Газа.
„Го повикувам Израел да не прави ништо повеќе што би ги попречувало преговорите“, рече Макрон и повика на воспоставување палестинска администрација која би имала „монопол врз безбедноста во Газа“.
Тој истакна дека во моментов Израел продолжува да ги проширува своите операции во Газа, но стотици илјади луѓе се раселени, а нивните животи продолжуваат да бидат уништени.
Тој додаде дека дојде време за ослободување на 48-те заложници што ги држи палестинската група Хамас.