Американскиот претседател Доналд Трамп изјави дека, за разлика од европските сојузници кои брзо испраќаат авиони и системи за воздушна одбрана во Полска, тој ќе ѝ помогне на таа земја, но само по војната во Украина.
„Ние помагаме со разузнавање. Но, кога зборував за помагање на воздухопловните сили, мислев кога ќе заврши војната. Кога ќе заврши војната, ние ќе помогнеме во зачувувањето на мирот и мислам дека тоа ќе биде случај“, рече Трамп синоќа во интервју за Фокс њуз.
Потврда за американската помош по упадот на дваесет невооружени руски беспилотни летала во воздушниот простор на Полска во ноќта на 10 септември побара полскиот претседател Карол Навроцки по тој упад, што Полска и НАТО го оценија како руска провокација, и објавија по телефонскиот разговор со Трамп дека добил таква потврда.
Трамп, сепак, синоќа продолжи да негира дека Русија ги испратила беспилотните летала намерно.
„Не можам да коментирам дали беше грешка или не. Но, да бидеме искрени, не требаше да бидат таму. Но, изгледа дека ги исклучија. Знаете, денес можете да исклучите дрон. И тие сами се спуштаат. Да се надеваме“, рече Трамп.
Полскиот министер за внатрешни работи Марчин Кервински вчера објави дека во четвртокот навечер повторно се регистрирани неколку упади на руски и белоруски дронови во полскиот воздушен простор, меѓутоа, за разлика од упадот на 10 септември, овој пат само за неколку моменти и дека тие веднаш се вратиле на територијата на Белорусија.
Полските власти и Полјаците се задоволни од реакцијата на европските сојузници кои, поради упадот на мамките дронови длабоко во полскиот воздушен простор, ја започнаа мисијата на НАТО Источна гарда и испраќаат дополнителни борбени авиони и противракетни системи на источното крило на НАТО, а според анкетите, 67 проценти од Полјаците веруваат дека тие ќе им дојдат на помош во случај на напад.
Сепак, ова не важи за САД, бидејќи по низата изјави на Трамп, верувањето на Полјаците дека можат да се потпрат на својот главен сојузник слабее.
Бројот на Полјаци кои веруваат дека САД би ги оставиле на цедило се зголеми на 33,1 процент, дури 29 проценти не знаат што да мислат, а помалку од половина, 37,9 проценти, од испитаниците во најновата анкета за полскиот информативен портал Onet.pl веруваат дека Полјаците сè уште можат да се потпрат на САД во случај на напад.