Мексико објави дека има намера да ги зголеми царините за увоз на автомобили од азиските земји на 50 проценти, а Министерството за економија наведува дека тие имаат за цел да заштитат повеќе од 300.000 работни места.
Затоа, Мексико има намера да ги зголеми царините за увоз од земји со кои не склучило трговски договор, наведува Министерството за економија во документот, издвојувајќи ги Кина, Јужна Кореја, Индија, Индонезија, Русија, Тајланд и Турција.
Зголемените царини би опфатиле 8,6 проценти од вкупниот мексикански увоз, во вредност од 52 милијарди долари, според документ на министерството, и би заштитиле 325.000 загрозени работни места во индустријата.
Планирани се и царини од 35 проценти за челик, играчки и мотоцикли
Тарифите за увоз на автомобили од таа група земји би се зголемиле на 50 проценти, а планирани се и царини од 35 проценти за челик, играчки и мотоцикли. Во текстилната индустрија, царините ќе бидат помеѓу 10 и 50 проценти.
„Тие веќе имаат царини“, изјави министерот за економија Марсело Ебрард пред новинарите во средата кога беше прашан за предложените повисоки царини за кинеските автомобили, кои моментално изнесуваат 20 проценти.
„Планираме да ги зголемиме на максимално дозволено ниво“, додаде министерот, нагласувајќи дека „конкуренцијата е речиси невозможна без одредено ниво на заштита“.
Според него, целта на зголемувањето на царините е да се заштитат работните места во Мексико, бидејќи кинеските автомобили влегуваат на мексиканскиот пазар со цени пониски од „референтната вредност“. Ова би значело дека кинеските компании ги нудат со голем попуст.
Предлогот сè уште треба да биде одобрен од парламентот, каде што владата има значително мнозинство.