НАТО отвори нов команден центар во финскиот град Микели, на околу 250 километри од рускиот Санкт Петербург.
Станува збор за Командата на повеќе корпуси (MCLCC), која е формирана во соработка со финската армија и го зајакнува присуството на Алијансата во новата северна членка.
Објектот дополнително ја зајакнува одбранбената позиција на НАТО на источното крило, во време кога расте загриженоста за можен конфликт со Русија.
Командата се наоѓа на околу сто километри од финско-руската граница, а нејзина задача е да ги надгледува и координира копнените сили на Алијансата и националните армии во северната област.
„Ова вклучува планирање, подготовка и спроведување заеднички вежби на Алијансата“, соопшти финската војска.
Меѓу најблиските центри
Првично, таму ќе работат десет членови на персоналот, а во текот на следните неколку години нивниот број ќе порасне на педесет, вклучувајќи војници од Финска и други земји.
Финскиот министер за одбрана Анти Хаканен го одобри формирањето на оваа команда во август.
Новиот центар се рангира меѓу најблиските команди на НАТО до руската граница, заедно со мултинационалните команди во Адажи во Латвија, Елбланг во Полска и Шчеќин.
По една деценија неутралност, Финска се приклучи на НАТО во 2023 година, како одговор на руската инвазија на Украина.
Една година подоцна, Шведска се приклучи на Алијансата.
Во мај, финската армија процени дека по завршувањето на војната во Украина, Русија ќе ги зајакне своите воени сили долж заедничката граница од 1.340 километри.