Големото национално собрание на Турција усвои резолуција со која ги повикува сите парламенти во светот да ги прекинат воените и трговските односи со Израел, како и да го започнат процесот на суспендирање на членството на Израел во Обединетите нации сè додека, како што е наведено, не се запре геноцидната политика на земјата во Газа, објавува денес Хаберлер.
„Резолуцијата за одлуката на Израел за проширување на окупацијата во Газа и геноцидот врз палестинскиот народ“, презентирана на Генералното собрание на Турското големо национално собрание (ТБММ), беше едногласно усвоена во петокот.
Документот изразува цврст став дека израелската окупација и проширувањето на воените операции во Газа мора да се прекинат и нагласува дека ова е систематско насилство врз палестинскиот народ.
„Ги повикуваме сите земји и нивните парламенти да ги прекинат односите со Израел и да преземат итни чекори за прекинување на нелегалното ембарго врз палестинскиот народ. Исто така, бараме Израел да биде суспендиран од членство во Обединетите нации и други меѓународни организации сè додека не ги напушти своите геноцидни политики“, се наведува во резолуцијата.
Со овој документ, според официјалните лица, Турција сака да го зајакне меѓународниот притисок врз Израел, но и да ја поттикне глобалната солидарност со Палестинците.
Во усвоениот документ се наведува дека Генералното собрание на Големото национално собрание на Турција остро ги осудува практиките на окупација, уништување и анексија на кои палестинскиот народ е подложен од страна на Израел со децении и се наведува дека масакрите врз палестинскиот народ и неодамнешната употреба на глад како оружје за уништување во Газа претставуваат злосторство геноцид.
Овој политички потег следува по низа остри мерки што Анкара веќе ги воведе против Израел.
Турскиот министер за надворешни работи Хакан Фидан објави на Генералното собрание на ОН дека Турција ги прекинува сите економски и трговски односи со Израел, го затвора своето небо за израелските авиони и се приклучува на меѓународна иницијатива со која се бара прекин на испораките на оружје и муниција во Тел Авив.