Еден човек е убиен во израелски напад врз село на југот на Сирија, објави денес сириската новинска агенција САНА, еден ден по израелскиот упад на сириска територија, кој властите го осудија.
Откако исламистичката коалиција го собори Башар ал-Асад во декември 2024 година, Израел изврши стотици напади врз земјата, со која технички е во војна, а во исто време отвори дијалог со новите власти.
„Еден млад човек е убиен во израелско бомбардирање на куќа во селото Тарнаџа“, на сириската Голанска Висорамнина, од која дел беше окупиран и анектиран од Израел.
Сириското Министерство за надворешни работи во понеделник ја објави веста за „воен упад на израелските окупаторски сили во регионот Беит Џин“ на југот на Сирија.
Министерството го осуди „флагрантното кршење“ на суверенитетот на земјата и ја осуди „таа опасна ескалација“.
Израелската армија минатата недела објави дека извршила операции во јужна Сирија, каде што открила и запленила „скриени места за оружје и уапсила осомничени“.
По падот на поранешниот сириски претседател, израелската војска распоредила сили во демилитаризираната тампон зона контролирана од ОН во Голанската Висорамнина, која се граничи со областа што Израел ја анектираше во 1981 година.
Двете земји, непријатели со децении, сепак започнаа дијалог под покровителство на САД.
На 19 август, сирискиот министер за надворешни работи Асад Ал Шаибани се сретна со израелска делегација во Париз за да разговара за ублажување на тензиите меѓу двете соседни земји.