Полска и Финска размислуваат за обновување на своите мочуришта како дел од новата стратегија за заштита на границите, објавува Политико.
Според извештаите, овој пристап има двојна улога – зачувување на природата и истовремено зајакнување на безбедноста од можна закана од исток.
„Ова е win-win ситуација која постигнува неколку цели одеднаш“, рече Тарја Харанен, генерален директор за прашања поврзани со природата во Министерството за животна средина на Финска.
Според извештаите, претставниците на Полска и Финска активно го проучуваат начинот на кој мочуриштата би можеле да станат дел од одбранбениот систем.
Бидејќи повеќето од овие области во Европа се наоѓаат веднаш до руската граница, нивното обновување, покрај еколошкиот ефект, би можело да има и воено значење – создавање потенцијални стапици за камиони и тенкови.
Се потсетува дека на крајот на март оваа година, четири американски војници ги загубија животите во Литванија, кога нивното оклопно возило се заглави во мочуриште за време на вежба и се преврте за време на евакуацијата.
Тој инцидент дополнително го насочи вниманието кон природните бариери како безбедносен фактор во регионот.