Варшава нема намера да испраќа војници на мисија во Украина по завршувањето на војната, но Полска ќе биде одговорна за логистичката организација на помошта за Киев, како и за заштитата на европската граница, изјави денес полскиот премиер Доналд Туск на прес-конференција по средбата со канадскиот премиер Марк Карни.
Разговорите беа фокусирани на билатералните односи меѓу Полска и Канада и актуелната меѓународна ситуација, особено во областа на безбедноста, пишува порталот „Онет Вјадомосци“.
„Го забрзавме процесот на продлабочување на стратешката соработка. Наскоро ќе ги подигнеме нашите полско-канадски односи на ниво на стратешко партнерство. Двајцата ги изразивме нашите намери да го забрзаме овој процес“, рече Туск на прес-конференција.
Тој нагласи дека, заедно со канадскиот премиер, може да ја потврди подготвеноста на Канада и Полска да продолжат да ѝ помагаат на Украина во нејзината одбрана од руската агресија.
„Ќе соработуваме многу тесно со Канада. Потврдив дека Полска нема намера да испраќа војници на мисија во Украина по завршувањето на војната, но Полска ќе биде одговорна за логистичката организација на помошта за Украина, како и за заштитата на европската граница“, рече Туск, според Танјуг.
Порталот потсетува дека според резултатите од најновото истражување спроведено од SW Research за „Жечпосполита“, дури 66,8 проценти од Полјаците не веруваат дека Русија ќе престане со агресивните дејствија против други земји по евентуалниот мировен договор со Украина.
Само 14,7 проценти од испитаниците изразија увереност дека Русија ќе ги прекине своите воени операции, додека 18,5 проценти немаа мислење за ова прашање.