Повеќе од 80 проценти од случаите на кражби во продавници во Англија и Велс завршуваат без обвиненија, покажа новата анализа на Парламентарната библиотека.
Во годината што заврши во март 2025 година, полицијата затвори 289.464 случаи на кражби во продавници без идентификуван осомничен, што претставува 55 проценти од сите случаи, пишува Скај њуз.
Само 18 проценти од инцидентите резултираа со обвиненија. Вкупно се регистрирани 530.643 кражби, што е за околу 86.000 повеќе од претходната година и најмногу од почетокот на водењето евиденција во 2002 и 2003 година.
Метрополитенската полиција имаше најлоши резултати – 76,9 проценти од речиси 94.000 случаи беа затворени без осомничен, а 5,9 проценти доведоа до обвиненија.
Во просек, 793 инциденти со кражби во продавници дневно остануваат нерешени.
Либералните демократи ги оценија податоците како „апсолутен скандал“, повикувајќи на укинување на полициските и криминалните комесари и инвестирање во полициската работа на терен.
Конзервативците продолжуваат да ја обвинуваат владејачката Лабуристичка партија дека дозволува „епидемија на нерешен криминал“, додека опозицијата повикува на „пристап на нулта толеранција“ и поголема употреба на технологија како што е препознавањето лица.
Според анализата, вкупно 2,07 милиони кривични дела од сите видови во Велика Британија во текот на 2024 и 2025 година останале нерешени, а само 7,3 проценти од случаите завршиле со обвинение или покана за суд, објави Скај њуз.