Потпретседателот на САД, Џ.Д. Венс, изјави дека европските земји ќе мора да го преземат „лавовскиот дел“ од товарот кога станува збор за безбедносните гаранции за Украина.
„Не мислам дека треба да го носиме тој товар. Мислам дека треба да обезбедиме поддршка во запирањето на војната и убиствата. Сепак, треба да очекуваме, а претседателот сигурно очекува, Европа да игра водечка улога“, рече Венс во емисијата „The Ingraham Angle“ на „Fox News“.
„Без оглед на тоа каква форма ќе има, Европејците ќе мора да го преземат лавовскиот дел од товарот“, додаде потпретседателот на САД.
Воените претставници на НАТО одржаа „одличен, отворен разговор“ преку видео врска за резултатите од неодамнешните состаноци за војната во Украина, изјави претходно вчера висок функционер на НАТО.
Западни извори велат дека помала група во Вашингтон продолжува да дискутира за безбедносните гаранции за Украина.
„Во врска со Украина, ја потврдивме нашата поддршка. Приоритет останува праведен, одржлив и траен мир“, напиша на X шефот на воениот одбор на НАТО, адмиралот Џузепе Каво Драгоне.
По завршувањето на поширокиот состанок, помала група воени команданти продолжува во Вашингтон за да разговара за безбедносните гаранции за Украина, изјави западен извор.
Тој додаде дека генералот Ден Кејн, началник на Здружениот штаб на американската армија, ги води разговорите, во кои учествуваат воени лидери од шест членки на НАТО.
Изворот вели дека засега нема конкретни резултати бидејќи безбедносните гаранции не беа детално дискутирани на претходната видеоконференција.
Изворот изјави дека ќе има повеќе состаноци со поширок состав, откако помалата група ќе ги разработи опциите. Нема рок за завршување на дискусиите, а конечната одлука ќе ја донесат политичките лидери, додаде изворот.