Во првата половина од оваа година, Европската Унија увезе течен природен гас (LNG) од Русија во вредност од околу 4,48 милијарди евра, што е повеќе отколку во истиот период минатата година кога вредноста на испораките на руски LNG изнесуваше 3,47 милијарди евра, објави Европскиот завод за статистика.
Во првите шест месеци од 2025 година, вкупната вредност на увозот на LNG во ЕУ изнесуваше околу 26,9 милијарди евра.
Околу половина од тој увоз, во вредност од 13,7 милијарди евра, беше испорачан од Соединетите Американски Држави.
Соединетите Американски Држави беа и најголемиот европски снабдувач на LNG во 2024 година, со удел од 45 проценти во вкупниот увоз на овој извор на енергија во Унијата, објави Европската комисија.
Иако ЕУ воведе санкции за увоз на руска нафта и јаглен, увозот на гас досега беше поштеден од санкции, со оглед на тоа што некои земји-членки сè уште во голема мера зависат од рускиот гас, кој во Унијата пристигнува во форма на течен природен гас (LNG), но и преку гасоводи, вклучувајќи го и Турскиот тек.
Сепак, рускиот гас наскоро би можел да им се придружи на нафтата и јагленот, бидејќи Европската комисија подготви нацрт-планови за целосно запирање на увозот на руски гас до 2028 година.
Според предлогот на Европската комисија, забраната за увоз според новите договори ќе стапи на сила на 1 јануари 2026 година, додека испораките според постојните краткорочни договори ќе мора да се суспендираат од 17 јуни 2026 година.
Увозот на гас според долгорочни договори ќе биде забранет од 1 јануари 2028 година, според предлогот, кој сè уште треба да биде одобрен од Европскиот парламент и земјите-членки.
Мерките бараат поддршка од најмалку 15 од 27-те земји-членки што претставуваат најмалку 65 проценти од населението на Унијата.