Екипи за итни случаи и пожарникари се борат со повеќе шумски пожари низ Шпанија и Португалија, додека рекорден топлотен бран продолжува да го погодува регионот, објавија медиумите.
Пожарникарите синоќа работеа на гаснење на пожар во општината Трес Кантос, околу 23 километри северно од Мадрид, пишува Би-Би-Си.
Екстремната температура, која достигнува до 44 степени Целзиусови во Шпанија и Португалија, се очекува најмалку до утре, предупредуваат официјалните лица.
На север од Шпанија, во регионот Кастиља и Леон, вчера беа евакуирани околу 800 луѓе од шест села поради неколку активни пожари во близина на Националниот парк Лас Медулас, кој е под заштита на УНЕСКО.
Жителите на Конгоста се обидоа да ги одбранат своите домови со гаснење на пожарот со вода од градинарски црева, додека две куќи веќе беа уништени.
Во Португалија, околу 700 пожарникари се борат со пожар во областа Транкозу, околу 350 километри североисточно од Лисабон.
Околу 52.000 хектари шума изгореа во Португалија досега оваа година, што е за 10.000 хектари повеќе од просекот за истиот период во изминатите 18 години, според Европскиот информативен систем за шумски пожари, објави Ројтерс.
Пожарникарските екипи се активни и во регионите Навара на североисток и Уелва на југозапад од Шпанија.
Службениците истакнуваат дека високата температура и сувите ветрови ги зголемиле ризиците од пожар, а некои пожари се поврзани со можно палење, што властите го опишуваат како „еколошки тероризам“.