Американскиот претседател Доналд Трамп има намера да се сретне лице в лице со рускиот претседател Владимир Путин уште следната недела, пишува вечерва „Њујорк тајмс“, повикувајќи се на свои извори.
Според тие извори, Трамп им го претставил планот на европските лидери во телефонски разговор со нив.
Идејата на американскиот претседател е по средбата со Путин да има трилатерална средба меѓу Путин, него и претседателот на Украина, Володимир Зеленски.
Како што пишува „Њујорк тајмс“, „на средбата ќе има само овие тројца“, и нема да има присуство на „европски колеги“.
Европските лидери, кои се обидоа да бидат координирачки фактор на состаноците со цел да се стави крај на руско-украинската војна, „очигледно го прифатија она што им го кажа Трамп“, додава угледен американски весник, повикувајќи се на еден од своите извори.
Не беше јасно дали Зеленски и Путин се согласиле со планот опишан од Трамп.
Сепак, весникот тврди дека украинскиот претседател присуствувал на разговорот меѓу шефот на Белата куќа и европските лидери.
Војната меѓу Русија и Украина започна во 2022 година со руската инвазија за време на администрацијата на американскиот претседател од редовите на Демократската партија, Џозеф Бајден.
Администрацијата на Бајден ги поддржа напорите на Украина да се одбрани од руската инвазија и да ги врати окупираните територии со изобилство воена помош.
Новиот, републикански претседател на САД, Доналд Трамп, вети во претседателската кампања дека ќе ја запре војната меѓу двете земји.