Во невообичаен напад на пчели што се случи во недела наутро во францускиот град Оријак, 24 лица беа повредени, од кои тројца се во критична состојба, објавија локалните власти.
Нападот се случил во центарот на градот и траел приближно половина час. Голем број пчели нападнале минувачи.
Според префектурата на одделот Кантал, службите за итни случаи, пожарникарите и медицинските екипи брзо пристигнале на терен за да им помогнат на повредените, додека полицијата го обезбедила подрачјето и поставила безбедносен кордон сè додека пчелите не престанат со своето агресивно однесување.
Тројцата најтешко повредени лица биле пренесени во локална болница.
Градоначалникот на Оријак, Пјер Матоние, изјавил за BFM TV дека нивната состојба се подобрува.
Еден од повредените, 78-годишен маж, доживеал срцев и респираторен застој и бил реанимиран, но сега е во стабилна состојба.
Другите двајца, рече градоначалникот, се во добра здравствена состојба.
Градоначалникот Матоние изјави дека причината за нападот може да биде конфликт помеѓу азиски стршлени и кошница што била поставена на тераса на хотел во центарот на градот пред повеќе од десет години.
Тој додаде дека е можно ова нарушување да предизвикало ненадејна агресија на пчелите.
Во меѓувреме, кошницата била отстранета од пчеларот кој бил задолжен за неа и преместена надвор од градот, потврди градоначалникот.
Командантот на локалната противпожарна служба, полковник Мишел Кајла, изјави дека никогаш не доживеал нешто вакво во својата кариера.
Тој рече дека жртвата, која доживеала срцев удар, морала да биде реанимирана во амбулантно возило.
„Во однос на бројот на повредени, паниката меѓу луѓето и сериозноста на повредите, сцената била навистина вознемирувачка“, изјави тој за телевизијата TF1.
Нападите од пчели стануваат сè почести во светот
Вакви напади од роеви пчели се регистрирани во различни делови од светот во последниве години, вклучувајќи ги Франција, САД и Бразил, и често се предизвикани од стресни услови на животната средина или присуство на инвазивни видови како што се азиските стршлени.
Ваквите инциденти резултираа со бројни повреди, хоспитализации, па дури и смртни случаи.
Експертите ја поврзуваат растечката агресивност на роевите со уништувањето на природните живеалишта, климатските промени и природното одбранбено однесување на пчелите кога се чувствуваат загрозени.
Во вакви ситуации, властите обично реагираат со изолирање на погодената област, отстранување на кошниците и издавање безбедносни предупредувања до граѓаните за да се спречат нови жртви.
Според американските Центри за контрола и превенција на болести (CDC), помеѓу 2011 и 2021 година, во САД имало 788 смртни случаи поврзани со убоди од пчели, оси и стршлени, што во просек изнесува околу 72 смртни случаи годишно. Околу 84 проценти од тие жртви биле мажи.
🐝⚡ Attaque d’abeilles à d’Aurillac : 24 blessés et une enquête ouverte
En attendant, le procureur a demandé le déplacement des ruches et l’euthanasie des 70 000 abeilles agressives. #JT20h pic.twitter.com/ylc60usUy7
— Le20h-France Télévisions (@le20hfrancetele) July 7, 2025