САД регистрирале 1.277 случаи на мали сипаници од почетокот на 2025 година, што ја прави епидемијата најлоша во повеќе од три децении, соопшти Универзитетот Џонс Хопкинс.
Според Центарот за контрола и превенција на болести (CDC), најголемиот број заразени лица се невакцинирани лица, додека само осум проценти од потврдените случаи се регистрирани кај луѓе кои примиле една или две дози од MMR вакцината.
Најголем број случаи се регистрирани во државите Ново Мексико, Оклахома и Тексас, но епидемијата се шири и во други делови од земјата.
CDC предупредува дека најранливи се децата под петгодишна возраст, кои сочинуваат дури 28 проценти од вкупниот број на пациенти.
Здравствените власти ги повикаа сите летни кампови да го проверат статусот на вакцинација на учесниците, со оглед на тоа што присуството на голем број деца на едно место го зголемува ризикот од ширење на болеста.
„Камповите треба да добијат доказ за вакцинација, да ги прегледаат децата по пристигнувањето и да подготват соби за изолација во случај на симптоми“, се наведува во најновите упатства на CDC.
MMR вакцината (мали сипаници, заушки и рубеола) се смета за безбедна и многу ефикасна, при што една доза обезбедува 93 проценти заштита од мали сипаници, додека две дози обезбедуваат 97 проценти заштита.
И покрај достапноста на вакцината, како што објаснува CNN, четврта година по ред, САД не ја достигнаа целта од 95 проценти вакцинација кај децата од предучилишна возраст, што е прагот што, според Министерството за здравство на САД, е потребен за да се спречат пошироки епидемии.
Експертите предупредуваат дека сипаниците не се „бенигна болест на детството“, како што се обидуваат да прикажат некои антиваксери, туку дека вирусот може да предизвика сериозни компликации, вклучувајќи пневмонија, воспаление на мозокот (енцефалитис) и губење на слухот, додавајќи дека сипаниците остануваат една од најзаразните болести во светот.