Членките на Европската Унија се согласија да ги продолжат санкциите против Русија за уште шест месеци, до јануари 2026 година.
Рокот за продолжување на секторските санкции е 31 јули, а овој договор дојде еден месец пред рокот, што беше доста изненадувачки, со што се избегна нова драма со Унгарија, која постојано се заканува да ја блокира оваа одлука.
Санкциите на ЕУ мора да се обновуваат на секои шест месеци.
Постојат две групи санкции, секторски како што е забрана за извоз на разни производи во Русија, како и список на поединци и компании на кои им е забранет влез и им е замрзнат имотот.
Санкциите се обновуваат во јануари и јули, а списокот на лица и компании во март и септември.
Од друга страна, сè уште нема договор за најновиот, 18-ти предлог за санкции против Русија, на кој се спротивставуваат Словачка и Унгарија.
Двете земји бараат да им биде дозволено да продолжат да купуваат руски гас и нафта.
Комисијата неодамна предложи ЕУ дефинитивно да се ослободи од зависноста од руските фосилни горива до крајот на 2027 година.