Украинскиот претседател Володимир Зеленски во саботата изјави дека Украина работи на брз развој на дронови-пресретнувачи за да се спротивстави на роевите руски дронови кои во сè поголем број се спуштаат кон украинските градови во последните недели.
Украинските власти забележаа нагло зголемување на бројот на руски дронови „Геран“ (верзија на иранските дронови „Шахед“) испукани од Русите преку ноќ и велат дека е клучно да се развие технологија способна да се справи со заканата што ја претставуваат овие дронови.
– Исто така, работиме одделно на дронови-пресретнувачи, кои се наменети за подобрување на заштитата од дронови „Шахед“. Неколку од нашите домашни компании – и, соодветно, различни видови дронови – даваат резултати. Обемот на производство на пресретнувачи веќе се зголемува, рече украинскиот претседател Володимир Зеленски во своето вечерно видео обраќање.
Руските сили испратија повеќе од 400 дронови во една ноќ, а повеќе од 470 неколку пати.
Вкупно 440 дронови, плус 32 ракети, беа лансирани оваа недела во „комбиниран“ напад врз Киев, кој срамни со земја дел од станбена зграда и уби 28 лица.
– Воздушната одбрана од дронови ќе ни помогне рационално да ги користиме нашите ресурси. Не можеме постојано да користиме ретки воздушни и противвоздушни водени ракети и самите воздухопловни сили за лов на непријателски дронови, изјави портпаролот на воздухопловните сили, Јуриј Ихнат, за украинските медиуми оваа недела. Непријателот распоредува сè повеќе „Шахед“ и затоа бараме различни методи за да му се спротивставиме, додаде тој.
Зеленски и други украински претставници го истакнаа домашното производство на дронови како клучен елемент на националната одбрана, а производството драматично се зголеми од практично непостоечко пред инвазијата на Русија во февруари 2022 година.
Зеленски им рече на странските производители на оружје минатиот ноември дека Украина може да произведува четири милиони дронови годишно и брзо го зголемува производството на друго оружје.
Украина, исто така, испрати дронови до разни цели во Русија, претежно индустриски и воени. Во голема операција претходно минатиот месец, украинските дронови нападнаа стратешки бомбардери на руски аеродроми.