Администрацијата на Доналд Трамп им нареди на американските амбасади да ги суспендираат закажаните термини за студентски визи, додека се подготвува да го прошири процесот на проверка на социјалните медиуми.
По обидот да му забрани на Харвард да запишува странски студенти, администрацијата на Доналд Трамп презеде нови мерки.
Во копија од меморандумот испратен до дипломатските мисии, државниот секретар Марко Рубио рече дека паузата ќе трае „додека не се издадат дополнителни упатства“.
Рубио додаде дека ќе се засилат проверките на социјалните медиуми за студентски визи и визи за размена, објави CBS News.
Зголемените проверки се случија поради тврдењата на Трамп дека одредени американски универзитети се премногу „левичарски“ и дека промовираат „антисемитизам“.
Претседателот на САД неодамна се обиде да му забрани на Харвард да запишува странски студенти, а спроведувањето на таа наредба беше одложено од федерален судија.