Воздушниот сообраќај околу Москва денес беше прекинат поради напад на украински дронови , соопшти руското Министерство за одбрана, додавајќи дека од вкупно околу 100 пресретнати беспилотни летала, 35 биле пресретнати додека се приближувале кон главниот град.
„Системот за воздушна одбрана пресретна и уништи вкупно 105 украински дронови“, се вели во соопштението на министерството.
Градоначалникот на Москва, Сергеј Собјанин, напиша на Телеграм дека спасувачките служби се испратени на местата каде што се урнале дроновите.
Украинските воздухопловни сили, од своја страна, изјавија дека Русија испратила 128 беспилотни летала над Украина во текот на ноќта, од кои 112 биле соборени и пресретнати со електронски средства.
Двете земји речиси секојдневно вршат напади една врз друга со беспилотни летала, но Москва ретко била погодена.
Летовите беа суспендирани денес на неколку аеродроми во главниот град, соопшти агенцијата за цивилно воздухопловство Росавијација, вклучувајќи го и главниот меѓународен аеродром Шереметјево, како и аеродромите Внуково, Домодедово и Жуковски.
Рускиот претседател Владимир Путин ги отфрли повиците на Киев, Вашингтон и Европејците за трајно примирје.