Сириската влада потпиша меморандум за разбирање со државна компанија од Обединетите Арапски Емирати за инвестиција вредна 800 милиони долари во пристаништето Тартус, објави сириската новинска агенција САНА кратко по укинувањето на американските санкции врз Сирија.
Договорот за изградба и управување со повеќенаменскиот терминал во Тартус вклучува соработка во воспоставувањето индустриски и слободни трговски зони.
„ДП Ворлд“, компанијата што го потпиша меморандумот со Дамаск, е подружница на „Дубаи Ворлд“, државната инвестициска компанија на ОАЕ.
САД и санкциите против Сирија
Сирија се обидува да привлече странски инвестиции за да ја зајакне својата економија уништена од граѓанската војна, а договорот со Емиратите беше потпишан истата недела кога американскиот претседател Доналд Трамп објави укинување на американските санкции врз Сирија за време на неговата посета на Саудиска Арабија.
Трамп рече дека ја донел одлуката по разговорите со саудискиот престолонаследник Мохамед бин Салман и турскиот претседател Таип Ердоган, двајца лидери кои силно повикаа на укинување на тие мерки.
Во среда во Ријад, американскиот претседател се сретна и со сирискиот претседател Ахмед ал-Шар, поранешен милитант баран од САД, кој ја презеде контролата врз земјата по соборувањето на Башар ал-Асад.