Наредбата на американскиот претседател Доналд Трамп за цените на лековите ја загрозува планираната инвестиција на „Рош“ во САД од 50 милијарди долари, соопшти компанијата денес.
Наредбата потпишана од Трамп пред три дена им наложува на фармацевтските компании да ги намалат цените на оригиналните лекови и да ги усогласат со цените што ги плаќаат другите богати земји.
Аналитичарите и правните експерти веруваат дека оваа политика ќе биде тешко да се спроведе.
„Доколку предложената регулатива стапи на сила, способноста на „Рош“ да ги финансира значајните инвестиции во САД што компанијата претходно ги објави ќе биде доведена во прашање“, соопшти швајцарската фармацевтска компанија.
Регулативата не треба да влијае на работењето на компанијата во 2025 година, според Рош, кој најави дека ќе продолжи да соработува со администрацијата на Трамп и Конгресот.
Други компании, исто така, најавија инвестиции во САД
Во април, „Рош“ објави дека ќе инвестира 50 милијарди долари во САД во текот на следните пет години и ќе создаде повеќе од 12.000 работни места.
Неколку други големи фармацевтски компании, вклучувајќи ги „Ели Лили“, „Џонсон и Џонсон“ и „Новартис“, исто така најавија големи инвестиции во САД, како одговор на притисокот на Трамп да го врати фармацевтското производство на американско тло.
„Новартис“, другиот голем швајцарски производител на лекови, вчера изјави дека нема планови да ја промени својата инвестициска стратегија во САД како одговор на регулативата.
„И во САД и во Европа, се залагаме за потребните промени, вклучително и намалување на улогата на PBM (компании за управување со програми за лекови на рецепт) и корекција на екстремно ниските цени во Европа“, изјави компанијата за Ројтерс.
„Промените нема да бидат брзи“
„Тие дискусии ќе потраат некое време, па затоа не очекуваме никакви брзи промени“, нагласува „Новартис“.
Во САД, цените на лековите се одредуваат во сложени преговори со учество на PBMs, кои дејствуваат како посредници помеѓу производителите на лекови и давателите на здравствено осигурување, а приватните компании често се обвинуваат за претерување со трошоците.
Во Европа, повеќето земји имаат систем за јавно здравство кој преговара директно со производителите, со што се постигнуваат пониски цени.
Откако ја презеде функцијата, Трамп постојано се закануваше дека ќе воведе царини за лекови, а неговиот кабинет спроведува истрага за увозот на фармацевтски производи, за да може да воведе царини од причини поврзани со националната безбедност.