Американскиот претседател Доналд Трамп треба да ја заврши кратката посета на Катар во четврток наутро со говор пред американските трупи пред да отпатува за Обединетите Арапски Емирати, каде што лидерите на земјата се надеваат на помош од САД за да ја направат богатата земја од Заливот глобален лидер во вештачката интелигенција.
САД имаат прелиминарен договор со ОАЕ што им овозможува да увезуваат 500.000 од најнапредните чипови за вештачка интелигенција на Nvidia годишно, почнувајќи од оваа година.
Договорот би поттикнал изградба на центри за податоци во земјата, кои се клучни за развој на модели на вештачка интелигенција.
Но, договорот предизвика загриженост за националната безбедност во различни делови од американската влада, па затоа условите би можеле да се променат, велат изворите.
За време на четиридневната посета на Трамп на земјите од Персискиот Залив беа потпишани низа економски договори, вклучувајќи договор со „Катар ервејс“ за купување до 210 авиони „Боинг“ со широк труп, обврска на Саудиска Арабија да инвестира 600 милијарди долари во Соединетите Држави и 142 милијарди долари во „голема“ продажба на американско оружје на кралството.
Во вторник, Трамп изненадувачки објави дека САД ќе ги укинат долгогодишните санкции против Сирија, а потоа се состана со сирискиот привремен претседател Ахмед ал-Шара.
Во Абу Даби, Трамп ќе се сретне со лидерот на ОАЕ, шеикот Мохамед бин Зајед ал Нахјан.
Вештачката интелигенција веројатно ќе биде во фокусот на последната етапа од патувањето на Трамп.
Администрацијата на поранешниот претседател Џо Бајден воведе строга контрола врз извозот на американски чипови за вештачка интелигенција на Блискиот Исток и други региони.
Меѓу стравувањата на администрацијата на Бајден беше дека вредните полупроводници ќе бидат пренасочени кон Кина и ќе ја зајакнат воената моќ на Пекинг.
Трамп го постави подобрувањето на односите со некои земји од Персискиот Залив како клучна цел на неговата администрација.
Доколку сите предложени договори за чипови со земјите од Персискиот Залив, а особено со ОАЕ, се реализираат, регионот би станал трета сила во глобалната конкуренција во областа на вештачката интелигенција, по САД и Кина.