Најмалку 52.862 Палестинци се убиени во војната од октомври 2023 година, соопшти Министерството за здравство во понеделник.
Во соопштението на Министерството се наведува дека во израелските напади врз Појасот Газа во последните 24 часа загинале 33 лица, додека 94 се ранети.
Со ова, вкупниот број на ранети во израелската офанзива се искачи на 119.648.
„Многу жртви се уште се закопани под урнатините и на патиштата, бидејќи спасувачите не можат да стигнат до нив“, се додава во соопштението.
Израелската војска ги обнови нападите врз Појасот Газа на 18 март и оттогаш уби 2.749 лица, а повреди повеќе од 7.600, со што заврши договорот за прекин на огнот и размена на затвореници што стапи на сила во јануари, јавува АА.
Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со обвинение за геноцид пред Меѓународниот суд на правдата поради војната во Појасот Газа.