Новата американска регулатива означува крај на ерата на практично бесцаринско онлајн купување од Кина.
Почнувајќи од денес, сите мали пакети што пристигнуваат во САД од кинески онлајн платформи како „Шеин“ и „Тему“ подлежат на увозни давачки по ставка, со што се затвора таканаречената дупка „de minimis“.
Ова значи дека производите што порано беа поевтини и без дополнителни трошоци – како маици од 10 долари или комоди од 30 долари – сега ќе бидат значително поскапи.
Промената веќе ги шокираше многу американски клиенти.
Една корисничка од Тампа, Аманда Норис, планирала да купи два појаса за кучиња преку Тему.
„Вкупната цена беше 33 долари, но увозните давачки додадоа уште 46 долари, па вкупната цена скокна на повеќе од 80 долари“, изјави таа за НПР.
Норис вели дека сега „бара алтернатива бидејќи повеќе не може да си дозволи Тему“.
Дополнително зголемување на цената
Администрацијата на Доналд Трамп тврди дека целта на промената е борба против шверцот на фентанил и други опасни супстанции, за кои велат дека често се кријат во евтини пакувања за да се избегнат контролите и царината.
Но, тие наведуваат и други причини: Заштита на американските работници и бизниси, кои не можат да се натпреваруваат со ултра ниските цени на кинеските продавачи, зголемување на буџетските приходи бидејќи државата изгуби милиони долари на пакети без царина и загриженост за принудна работа и фалсификување, особено кога станува збор за платформи како „Шеин“ и „Тему“.
Причината за зголемувањето на цената е укинувањето на исклучокот de minimis, што е американско законско ослободување старо речиси сто години, кое ги ослободувало малите пратки од царински давачки доколку вределе помалку од одреден износ.
Тој праг беше зголемен на 800 долари во 2016 година, што кинеските платформи брзо го искористија.
Тие испраќаа пакети директно до клиентите во САД, избегнуваа даноци и нудеа значително пониски цени.
„Логистички шок“
Во меѓувреме, бројот на вакви пратки експлодираше – денес има повеќе од милијарда годишно, кои не можат физички да бидат обработени од страна на американската царина.
Отсега па натаму, секој таков пакет мора формално да се пријави, со јасно наведено потеклото, содржината и вредноста.
Ова значи повеќе документација за увозниците и логистичките компании, како и доцнења во испораката.
„Тоа е огромен логистички шок за сите вклучени – потрошувачи, шпедитери и превозници“, рече Рам Бен Цион, директор на фирмата за дигитален мониторинг на трговијата „Ултра“.
Тему и слични платформи веќе почнаа да промовираат „локални производи“ – производи што веќе се наоѓаат во магацини во САД и за кои не се плаќа царина.
Но, дури и таа залиха брзо ќе исчезне.
Царинската служба на САД (CBP) предупредува дека многу пакети содржат фалсификувани или опасни производи и дека новите правила ќе овозможат подобро следење на увозот и сузбивање на шверцот.