Рускиот министер за надворешни работи Сергеј Лавров изјави дека делови од евентуалниот договор со САД за прекин на војната во Украина сè уште треба да се финализираат, иако верува дека процесот се движи во вистинската насока.
„Сè уште има некои специфични точки – елементи – од овој договор што треба да се доработат и ние се занимаваме со тој процес“, изјави Лавров за американската телевизиска станица Си-Би-Ес во четврток вечерта.
„Постојат неколку знаци дека се движиме во вистинската насока“, рече Лавров, додавајќи дека Русија е „подготвена да постигне договор“.
Неговите изјави уследија по комбинираниот руски ракетен и беспилотен напад врз Киев во кој, според украинските власти, загинаа најмалку 12 лица, а десетици беа ранети.
Нападот предизвика ретка директна критика од американскиот претседател Доналд Трамп, кој го повика рускиот претседател Владимир Путин да го запре насилството.
„Владимир, СТОП!“ напиша Трамп на својата платформа Truth Social, еден ден откако остро го критикуваше украинскиот претседател Володимир Зеленски за неговото одбивање да ја прифати руската окупација на Крим и го обвини за продолжување на војната.
„Не сум задоволен од руските напади врз Киев. Тие не се неопходни и се во многу лош тајминг“, напиша американскиот претседател, повикувајќи на мировен договор.
САД постојано се закануваат дека ќе се повлечат од преговорите доколку наскоро не се постигне договор.
Украина се брани од тотална руска инвазија повеќе од три години.