Папата Франциско, поглавар на Католичката црква од 2013 година, почина оставајќи зад себе силно наследство на едноставност, хуманост и блискост со луѓето.
Во текот на повеќе од една деценија на чело на Ватикан, тој се истакна како пример за духовно лидерство кое го отфрла материјалното богатство и луксузот.
Иако раководел со институција вредна милијарди долари, тој лично не поседувал ништо – ниту недвижен имот, ниту автомобили, ниту банкарски сметки.
И тоа не беше случаен избор.
Од првиот ден, папата Франциско ги одби сите привилегии што му припаѓаа по функција:
– Наместо да се пресели во луксузен папски апартман, тој реши да живее во скромна соба во Куќата на Света Марта, каде што живеат и обични свештеници и персонал.
– Наместо блиндирани лимузини, тој користеше Фиат, Форд Фокус или стар голф.
– Одеше на службени патувања во економска класа, без посебни барања.
– Не носеше златни наметки и скапи прстени – наместо тоа, избра едноставни бели наметки и сребрен прстен.
Во свет во кој многу верски водачи не го кријат богатството и луксузот, папата Франциско свесно и доследно живееше како обичен човек.
Неговиот начин на живот значел и големи заштеди за Ватикан – анализите покажуваат дека отфрлајќи ги папските привилегии за Црквата, тој годишно штедел милиони евра.
Колку навистина вреди Ватикан – а колку вредел папата Франциско?
Проценките за вкупното богатство на Ватикан се движат од 5 до 15 милијарди долари, во зависност од тоа што се зема предвид – пари, злато, уметност, недвижнини, инвестиции…
Но, папата Франциско никогаш немал лична контрола врз тоа богатство, ниту пак некогаш го користел за свои потреби.
Наместо трошење, тој постојано зборуваше за важноста на штедењето, скромноста и помагањето на сиромашните.
Тој често ја критикуваше корупцијата во редовите на Црквата и се залагаше Црквата да се спушти меѓу луѓето, наместо да биде над нив.
Неговото наследство
Папата Франциско, повеќе од сè друго, сакаше светот да го гледа папата не како симбол на моќта, туку како слуга на народот и на Бога.
Неговата смрт е голема загуба за милиони верници ширум светот, но она што го остави зад себе – пример за искрена вера, почит и едноставност – долго ќе се памети.