Јапонија поднесе протест до Русија поради нејзината одлука привремено да го ограничи преминот на странски воени и владини бродови во водите околу островите кои ги контролира Русија, за кои има право на Јапонија.
Станува збор за островите кои Јапонија ги нарекува Северни територии, додека Русија ги нарекува Јужни Курили, пренесе Ројтерс.
Спорот за тие острови трае од крајот на Втората светска војна и ги спречува двете земји да склучат мировен договор, наведува агенцијата.
– Поднесовме протест преку дипломатски канали, бидејќи оваа одлука не е во согласност со нашиот став за северните територии и е неприфатлива за нас, рече генералниот секретар на јапонската влада Јошимаса Хајаши на прес-конференција.
Според него, Русија најавила дека од среда до 1 мај нема да дозволи странски воени и владини бродови да пловат во водите околу тие острови.
Правото на „безопасно поминување“ низ територијалните води, загарантирано со Конвенцијата на Обединетите нации за поморското право, дозволува странски бродови да минуваат низ територијалните води на друга држава, освен ако не претставуваат закана за безбедноста.
Јапонија верува дека островите Итуруп, Кунашир, Шикотан и групата острови Хабомаи биле „нелегално окупирани од Советскиот Сојуз“ набргу по јапонската капитулација на 15 август 1945 година, додека Русија тврди дека тоа било легитимно.