Вулканот Спур на Алјаска сè уште не стивнува, објави Опсерваторијата на вулканите на Алјаска (AVO).
Активноста на овој вулкан пред неколку дена предизвика загриженост кај жителите на Енкориџ и околината, откако научниците предупредија дека наскоро може да се случи исклучително моќна експлозивна ерупција.
Во последното соопштение на AVO се наведува дека се следи вулканската активност, но има одредени проблеми со видливост.
„Сеизмичноста останува покачена, со повремени мали, плитки вулкански земјотреси под вулканот во текот на изминатиот ден. Камерите во живо не забележаа испарувања во периоди на добра видливост. Сателитските снимки не дадоа дополнителни информации поради облачноста“, се вели во соопштението на AVO.
„AVO продолжува да ја следи активноста на Спур за да открие сигнали што би укажале на ерупција што се приближува. Врз основа на претходните ерупции, се очекува дека евентуалното приближување на магмата до површината ќе биде придружено со промени во сеизмичката активност, деформација на тлото, условите на езерата на врвот и активноста на фумаролите. Вулканот се следи преку локални сеизмички, инфразвук, камери во живо и GNSS станици, како и регионални системи за детекција на инфразвук и гром, со помош на сателитски податоци“, се вели во соопштението.
Да потсетиме дека жителите на Енкориџ, најголемиот град на Алјаска, се подготвуваат за можна вулканска ерупција, за која научниците предупредија дека може да се случи за неколку недели.
Планината Спур, на која се наоѓа вулканот, е на околу 100 километри од градот Енкориџ, каде живеат речиси 300.000 луѓе.
„Кога ќе еруптира, настанот би бил експлозивен“, рече Мет Хени, главен научник во AVO, додавајќи дека ќе исфрли повеќе облаци од пепел кои би можеле да се издигнат до 15 километри во воздухот.
Секоја епизода за производство на експлозивна пепел би траела три до четири часа, предизвикувајќи Енкориџ и другите околни заедници да бидат зафатени во џиновски столб.
Вулканската пепел може да ги иритира очите, носот и грлото и да предизвика посериозни здравствени проблеми кај луѓето со астма, други форми на белодробни заболувања и тешки срцеви проблеми, според Меѓународната мрежа за вулкански опасности по здравјето (IVHHN).
Затоа жителите натрупаа маски N9-5 и латекс ракавици за да се подготват за слоевите пепел, заедно со очила, гас-маски и чизми за нивните кучиња.
На 20 март, претставниците на Енкориџ го подигнаа нивото на планирање во итни случаи на Ниво 2, што значи дека ќе ја зголемат комуникацијата со јавноста за заканата и агенциите за јавна безбедност ќе се подготват да започнат протоколи за одговор на ерупција.
Експертите проценуваат дека кратерот на врвот на вулканот не еруптирал веќе 5.000 години.
Но, неговиот страничен отвор, наречен Кратер Пик, последен пат еруптираше пред 30 години.
Ако Спар повторно еруптира, ерупцијата најверојатно ќе биде од овој страничен отвор и ќе изгледа слично на настанот од 1992 година, рече Хени.