Речиси сите училишта во Англија ја забранија употребата на мобилни телефони од страна на учениците, покажа првото национално истражување.
Претседателот на Националниот синдикат за образование (НЕУ) повика на законска забрана за телефони во училиштата, укажувајќи на „штетното влијание“ врз младите, пишува „Гардијан“.
Истражувањето, кое беше нарачано од детската комесарка за Англија, Рејчел Де Соуса, покажа дека раководителите брзо воведоа забрани за користење на паметни телефони за време на часовите.
Истражувањето опфати повеќе од 15.000 училишта и покажа дека 99,8 отсто од основните и 90 отсто од средните училишта имаат воведено некаква забрана.
Годишната конференција на NEU следната недела ќе ги разгледа предлозите кои бараат построга регулација на социјалните мрежи за отстранување на штетните содржини, вклучително насилство и закани врз жените.
Министерката за образование Бриџит Филипсон рече дека мобилните телефони „апсолутно немаат место во училниците“ поради потенцијални одвлекувања.
„Иако ова сеопфатно истражување покажува дека нашата поддршка за раководителите да воведат забрани во нивните институции функционира, ториевците се занимаваат само со наоѓање наслови во весниците, без оглед на фактичката ситуација на теренот“, рече таа.
Истражувањето на училишната политика покажа дека има одредени варијации во видовите на забрани.
Повеќето основни училишта бараат од учениците да ги предадат своите телефони на наставниците или да не ги носат на училиште.
Сепак, 79 отсто од средните училишта им дозволуваат на учениците да ги чуваат телефоните, но ја забрануваат нивната употреба, додека осум отсто бараат телефоните да се вклучат и само три отсто им забрануваат на учениците да носат телефони на училиште.
Детскиот комесар истражуваше колку време децата на возраст од осум до 15 години поминуваат на телефони, таблети или компјутери, при што 23 отсто рекле дека поминуваат повеќе од четири часа дневно, додека 20 отсто трошат помеѓу три и четири часа.
Де Соуса истакна дека овие деца „не го прават тоа додека се на училиште“.
„Ако сме сериозни да им помогнеме на децата да ги искористат многуте предности на интернетот, мора сериозно да пристапиме кон регулирање на она што тие можат да го видат, каде можат да го видат и да ја ограничиме штетата што технолошките компании во моментов ја предизвикуваат на нивното здравје, внимание и безбедност“, заклучува Де Соуса, според Танјуг.