Најмалку 14 цивили загинаа, а 29 се ранети во нападите на силите поддржани од Турција во северна Сирија во понеделникот и вторникот, соопшти курдската милиција поддржана од САД.
Сириските демократски сили (SDF) предводени од Курдите соопштија дека турските сили во вторникот со беспилотни летала целеле на пазар во градот Сарин, при што загинале осум цивили, а 20 се ранети.
Некои од повредените се во критична состојба, додаваат тие, пренесе Ројтерс.
Во гранатирањето на турските сили во друг дел на северна Сирија во вторникот загинаа тројца цивили, а девет лица беа ранети, според СДФ.
Тие, исто така, соопштија дека турските сили во понеделникот гранатирале село во близина на градот Аин Иса во северна Сирија, при што загинале тројца цивили, меѓу кои и две деца.
Турското Министерство за одбрана во изјавите во вторникот и средата соопшти дека турските сили убиле вкупно 27 курдски милитанти во северна Сирија, без да ги спомене цивилните жртви, пренесе Ројтерс.
Официјален претставник на турското Министерство за одбрана во средата рече дека тврдењата на СДФ се дезинформации и ги отфрли обвинувањата.
Турција тврди дека не гаѓа цивили во своите прекугранични операции и дека презема мерки за да избегне да им наштети на цивилите, верските објекти и населените места.
СДФ, сојузник на коалицијата предводена од САД против Исламската држава, е предводена од Единиците за заштита на народот (YPG) – група која Турција ја смета за терористичка организација и продолжување на Курдистанската работничка партија (ПКК), која има 40 години се бори против турската држава.
Откако бунтовниците поддржани од Анкара го соборија сирискиот претседател Башар ал Асад во декември, курдските фракции во Сирија се во дефанзива.
Сè уште не е јасно дали долгогодишната поддршка на САД за курдските сили ќе остане под администрацијата на претседателот Доналд Трамп.
Преговарачите од сириското раководство, САД, Турција и СДФ се фокусирани на можен договор за иднината на групата.
Новото сириско раководство сака повторно да воспостави контрола врз целата земја.
СДФ во средата ги отфрли тврдењата на Турција за бројот на нејзините борци убиени во нападите оваа недела.