Висок талибански функционер го повика лидерот на групата да ги укине забраните за образование на жените и девојчињата во Авганистан, велејќи дека нема оправдување за нив, во ретка јавна критика на владината политика, пренесува Си-Ен-Ен.
Шер Абас Станикзаи, заменик-шеф на Министерството за надворешни работи, завчера одржа говор во југоисточната провинција Хост.
На свеченост во верско училиште, тој рече дека нема причина да им се забранува образование на жените и девојчињата, немало никакво оправдување за тоа во минатото и воопшто не би требало да има.
Владата им забрани на жените да се школуваат надвор од шесто одделение, а минатиот септември имаше извештаи дека властите исто така ја прекинаа медицинската обука и курсевите за жени.
Дополнително, во Авганистан, само женски лекари и здравствени работници смеат да лекуваат жени и девојчиња, а не машки работници и лекари.
Властите се уште официјално не ја потврдиле забраната за медицинска обука.
„Половина од нашето население трпи неправда“
„Уште еднаш го повикуваме раководството да ги отвори вратите на образованието“, рече Станикзаи во видео споделено на неговиот официјален X профил.
„Ние им правиме неправда на 20 милиони луѓе од 40 милиони население и им ги ускратуваме сите нивни права. Ова не е дел од исламскиот закон, туку наш личен избор или природа“, рече тој.
Станикзаи своевремено го водеше талибанскиот тим во преговорите што доведоа до целосно повлекување на странските трупи од Авганистан.
Не е првпат да изјави дека жените и девојчињата го заслужуваат правото на образование.
Слични изјави тој даде во септември 2022 година, една година по затворањето на училиштата за девојки и неколку месеци пред воведувањето на забраната за студирање на универзитетите.
Сепак, последните коментари го означија неговиот прв директен повик за промена на политиката и апел до талибанскиот водач Хибатула Ахунџада.
Ибрахим Бахис, аналитичар од Јужна Азија во Кризата Група, рече дека Станикзаи веќе нагласил дека образованието на девојчињата е право на сите жени во Авганистан.
„Сепак, оваа последна изјава оди чекор подалеку со јавно повикување на промена на политиката и доведување во прашање на легитимноста на сегашниот пристап“, рече Бахис.
Русија и Индија градат односи со талибанците
Претходно овој месец, во пакистанската престолнина Исламабад, добитничката на Нобеловата награда за мир Малала Јусафзаи ги повика муслиманските лидери да ги предизвикаат талибанците по прашањето за образованието на жените и девојчињата.
Таа зборуваше на конференција организирана од Организацијата за исламска соработка (ОИЦ) и Муслиманската светска лига.
ОН нагласија дека признавањето на режимот на Талибанците е речиси невозможно додека забраните за образование и вработување на жените остануваат на сила, а на жените не им е дозволено да излегуваат во јавност без машки старател.
Ниту една земја не ги признава Талибанците како легитимни владетели на Авганистан, но некои држави, како Русија и Индија, градат односи со нив.