Русија се подготвувала за диверзантски операции против САД со поставување експлозивни направи во товарните пратки и нивното испраќање со авион.
Како одговор, САД го предупредиле рускиот претседател Владимир Путин за последиците од „поддршката на тероризмот“, објави Њујорк Тајмс, цитирајќи неименувани извори.
Во декември генералниот секретар на НАТО Марк Руте изјави дека Русија долго време не води прикриена, туку отворена војна против земјите на НАТО.
Тврдењата на Руте уследија по извештајот на ОБСЕ кој откри дека Русија извршила приближно 150 напади врз земјите на НАТО од почетокот на војната во Украина.
Овие напади вклучуваат сајбер напади врз железници, болници, GPS системи и водни мрежи.
Извештајот, исто така, ги нагласува хакирањето, саботажата и заканите за воените објекти и подводната инфраструктура.
Потеклото на запаливата операција датира од летото кога на аеродромите и магацините во Германија, Велика Британија и Полска почнаа да се палат навидум безопасни товарни пратки.
САД и Европа беа убедени дека Русија стои зад овие инциденти.
Војна на американско тло
До август, според Њујорк тајмс, претставниците на Белата куќа станале сè позагрижени за разузнавачките извештаи кои сугерираат дека Москва планира многу поширока операција – пренесување на војната од Украина на американско тло.
За време на серијата состаноци во Кризната соба, високите советници на претседателот Џо Бајден ги анализирале пресретнатите комуникации меѓу високи функционери на руската воена разузнавачка служба ГРУ.
Овие дискусии опишале пратки на стоки за широка потрошувачка кои се запалиле, вклучително и мал електричен масажер што се користел како уред за тестирање.
Откако Русите сфатиле како пакетите се движеле низ безбедносните системи на воздушниот товар и колку долго траел транспортот, следниот чекор бил да ги испратат овие предмети на летовите до САД и Канада со цел да предизвикаат пожари откако ќе се истоварат пратките.
Карго авионите биле примарна грижа, иако патничките летови понекогаш носат помали пакети во складот.
Построги мерки
Во август, американскиот секретар за внатрешна безбедност Алехандро Мајоркас воведе построги мерки за проверка на товарните пратки кои влегуваат во САД, според Њујорк Тајмс.
До октомври, по повеќекратните предупредувања, тој изврши притисок врз извршните директори на големите авиокомпании да ги забрзаат мерките за да се спречат катастрофи во текот на летот.
Некои од овие безбедносни мерки беа јавно објавени, а други останаа во тајност.
Зад затворени врати, претставници на Белата куќа се обиделе да утврдат дали рускиот претседател Владимир Путин лично го наредил планот за саботажа или не бил информиран.
Неколку официјални лица сугерирале дека диверзантските дејства би можеле да бидат дело на офицерите на ГРУ кои работат според општа директива за зголемување на притисокот врз САД и нивните сојузници во НАТО.
Според извори на Њујорк Тајмс, предупредувањата на крајот му биле доставени на Путин и се чини дека имале ефект.
Пожарите во Европа барем засега престанаа.
Сепак, останува нејасно дали Путин лично наредил прекин на операциите и колку долго ќе трае затишјето.
Постои можност Русија да го искористила ова затишје за да развие понапредни уреди кои потешко ќе се откријат при идни диверзантски напади, заклучуваат американските медиуми.