Претставници од околу 40 земји и активисти, вклучително и добитничката на Нобеловата награда за мир Малала Јусафзаи, се собраа на дводневен самит за образование на девојчињата во муслиманските земји, на кој претставниците на авганистанските талибанци не присуствуваа.
Самитот во Исламабад го отвори пакистанскиот премиер Шехбаз Шариф, а на него учествуваат министри и амбасадори од 44 земји, верски лидери, ОН и Светска банка.
„Муслиманскиот свет, вклучително и Пакистан, се соочува со големи предизвици во обезбедувањето на девојчињата еднаков пристап до образование како и момчињата. Негирањето на образованието на девојчињата значи отфрлање на нивните гласови и нивните избори, со што се лишуваат од правото да создадат посветла иднина“, рече тој Шариф.
Талибанците забранија девојчиња да одат на училиште
Авганистан беше поканет на самитот, но ниту еден претставник на Талибанците не одговори, потврди пакистанскиот министер за образование Калид Макбул Сидики, додавајќи дека присуствувале неколку Авганистанци кои работат за меѓународни организации.
По враќањето на власт во 2021 година, талибанците целосно го забранија средното и универзитетското образование за девојчињата.
ОН го осудија „родовиот апартхејд“.
Малала, која уште од своето детство се залага за правото на девојчињата на образование, смета дека „светските лидери треба да ги повикаат талибанците одговорни за злосторствата врз жените и девојчињата“.
Малала Јусафзаи имаше само 11 години кога почна да се бори против талибанскиот екстремизам во Пакистан и да се залага за правото на девојчињата на образование.
Таа ја продолжи борбата и откако пакистанските талибанци се обидоа да ја убијат во 2012 година.
Тие ја застрелаа во главата и вратот. Малала по тешка борба закрепна во болница во Англија.
Во 2014 година ја доби Нобеловата награда за мир. Таа тогаш имаше 17 години.
Таа е најмладиот лауреат на наградата Сахаров и Нобеловата награда во историјата.
Во 2017 година, Малала се запишала на колеџот Лејди Маргарет Хол на Универзитетот во Оксфорд во Обединетото Кралство.
Во 2020 година, таа ги заврши своите додипломски студии по филозофија, политика и економија и се врати во Оксфорд во 2023 година како почесен научен соработник на колеџот Линакре.
Со парите што ги добила со Нобеловата награда за мир, таа основала училиште за девојчиња во нејзиниот роден град во регионот Шангла во Пакистан.
Училиштето беше отворено во март 2018 година. Тоа беше нејзина прва посета на Пакистан по нападот на Талибанците.
Десетици милиони девојчиња не одат на училиште во муслиманските земји, особено во Бангладеш, Авганистан и Нигерија.
Пакистан, исто така, се соочува со образовна криза, со повеќе од 26 милиони деца без училиште.
Пакистански студенти исто така присуствуваат на самитот, вклучувајќи ја и Захра Тарик, студентка по клиничка психологија.
Таа смета дека самитот е добра иницијатива и дека девојчињата во руралните средини се соочуваат со најмногу пречки за образование.
„Во некои случаи, најголемата пречка за образованието на девојчињата се нивните семејства“, рече Тарик.