Израел денеска им наложи на своите дипломати во Европа да се обидат да ги убедат земјите домаќини да ги назначат јеменските бунтовници Хути како терористичка организација.
Користејќи беспилотни летала и ракети, Хутите вршат напади врз Израел, со образложение дека се солидаризираат со Палестинците кои се борат против израелската армија во Појасот Газа.
„Хутите претставуваат закана не само за Израел, туку и за целиот регион и за светот. Од суштинско значење е тие да бидат прогласени за терористичка организација“, изјави шефот на израелската дипломатија Гидеон Саар.
Тој изјави дека САД, Саудиска Арабија, Малезија, Обединетите Арапски Емирати, Австралија, Канада, Нов Зеланд и Израел ги прогласиле Хутите за терористичка организација, пренесува Ројтерс.
Во саботата, 14 лица беа ранети во ракетен напад на Хутите врз Тел Авив.