За Франција е објавено портокалово предупредување за невремето Дара, поради закана од силен ветер, снег и мраз, а поради прогнозираните временски услови, внатре ќе се одржи свеченото отворање на реновираната париска катедрала Нотр Дам.
Француската метеоролошка служба денеска предвидува силни налети на ветер во главниот град, а попладне врнежи од дожд пропратени со ветрови со брзина од над 70 километри на час, поради што вечерашната музичка програма по повод отворањето на катедралата ќе биде изменета, а најавениот свечен концерт ќе биде одложен, јавува телевизијата БФМ.
Вкупно 15 провинции се под готовност, од кои девет на северозападниот брег и уште две на југоисточниот дел поради силниот ветер, додека четири на југозапад се ставени во состојба на готовност поради снег и можни лавини.
Девет провинции во северозападна Франција, меѓу кои и Ла Манш, Сен Маритим и Па де Кале, меѓу другите, се ставени под портокалова тревога поради силните ветрови.
Поради силните ветрови, Француските железници соопштија дека услугите на регионалните железнички линии ќе бидат целосно прекинати за викендот, а услугите на некои линии во Бретања, Нувел-Аквитанија и регионот Лоара ќе бидат суспендирани или изменети.
Во југозападниот дел на Франција, поради снег и мраз е објавен портокалов аларм за четири провинции.
Метеоролозите сметаат дека вкупната количина на снег ќе достигне и до метар и половина на планините.
На пониските, од околу 800 метри, се предвидува снег меѓу 15 и 30 сантиметри, додека на повисоките од 1.200 до 1.400 метри, снегот може да достигне висина од 70 сантиметри до еден метар.
Овие снежни врнежи придружени со силен ветер може да предизвикаат опасни снежни наноси и да го зголемат ризикот од лавини во регионот, посочуваат метеоролозите.
Метеоролозите предупредуваат дека откако ќе помине бурата Дара, ќе следи многу нестабилно време, со обилни врнежи од дожд во текот на попладневните часови, што ќе го зголеми ризикот од натамошно слабо време.
На удар од бурата Дара е и Велика Британија, пренесува Танјуг.