Доналд Трамп е подготвен да изврши притисок врз Украина да се согласи на договор за прекин на огнот за да ѝ докаже на американската јавност дека може да ги исполни своите ветувања, изјави воен аналитичар и поранешен американски воен советник.
Да потсетиме дека Трамп во предизборната кампања вети дека брзо ќе ја заврши војната во Украина доколку се врати во Белата куќа, но не објасни како ќе го постигне тоа.
Марк Војгер, поранешен специјален советник за руски и евроазиски прашања на командантот на американската војска во Европа, изјави за Sky News дека Трамп најверојатно ќе бара „мир заради мирот“.
„Мислам дека тој би бил подготвен да изврши притисок врз Украина за да се постигне мир – не заради правдата и не заради враќање на украинскиот суверенитет и казнување на руската агресија, туку мир заради мирот, за да може да постигне на неговата изборна база тоа што го вети“, рече тој.
„Трамп нема моќ да го притисне Путин“
„Секој договор предложен кога Трамп ќе се врати на функцијата најверојатно ќе дојде како резултат на притисок врз Украина со закана дека ќе ја запре виталната помош“, рече Војџер, додавајќи дека Трамп „нема моќ да влијае на однесувањето на Путин“.
На прашањето дали мисли дека претстојното претседателство на Трамп е штетно за судбината на Украина, Војџер рече дека е.
„Трамп ќе биде повеќе склон да соработува со автократите“, рече тој.
„Тој има автократски инстинкти. Тој е изолационист. Таквото однесување ќе му наштети на НАТО, трансатлантската солидарност и на крајот ќе ги загрози столбовите на меѓународниот поредок каков што го знаеме“, рече тој.