Украина планира да мобилизира уште 160.000 војници, објавија државните претставници.
Русија напредува во Доњецк, во источна Украина, а во вторникот објави дека го освоила рударскиот град Селидово.
Мобилизацијата беше најавена откако се појавија информации дека голем број севернокорејски војници се распоредени во Русија.
Украинската војска е под голем притисок, делумно поради тоа што руските сили се побројни.
Украинскиот парламент во април усвои нов закон за мобилизација, кој предвидува дека секој маж на возраст меѓу 25 и 60 години мора да внесува податоци во електронската база на податоци.
Така, процесот на мобилизација е забрзан, а затајувањето е казниво.
Регрутирањето ќе трае три месеци, пренесува AFP.
Последното соопштение за планираната мобилизација дојде откако руското Министерство за одбрана објави дека го контролира Селидово во Доњецката област, како и околните села, во натамошниот напад кон Покровск.
Руската инвазија на Украина трае повеќе од две и пол години, а генералниот секретар на НАТО Марк Руте тврди дека повеќе од 600.000 руски војници сега се убиени или ранети во војната.
Зеленски во понеделникот рече дека околу 650.000 руски војници биле убиени или ранети.
„Тие [Русите] не ги собираат телата… нивните луѓе се оставени да скапуваат на земја“, рече тој во интервју за „Тајмс оф Индија“.
Досега Москва и Киев ретко објавуваа официјални податоци за жртви.
Но, според анализата на рускиот сервис на Би-Би-Си, потврдено е дека во досегашниот тек на војната загинале повеќе од 70.000 руски војници.
Во февруари, Зеленски рече дека околу 31.000 украински војници биле убиени за време на руската инвазија.
Сепак, проценките на повеќе западни медиуми велат дека бројката е многу поголема.
Додека на истокот на Украина продолжуваат големите борби, една од главните теми се извештаите за пристигнувањето на севернокорејски војници во Русија за да помогнат во војната против Украина.
Пентагон проценува дека околу 10.000 севернокорејски војници се обучуваат на далечниот исток на Русија.
Тие додаваат дека „мал број“ севернокорејски војници се испратени во рускиот пограничен регион Курск, каде руските и украинските единици се борат повеќе од два месеци по ненадејниот упад на силите на Киев.
Јужна Кореја тврди дека севернокорејските војници се обучуваат на различни локации, а многумина носат руски униформи.
Висок јужнокорејски функционер верува дека околу 11.000 војници веќе се испратени во Русија, а најмалку 3.000 се испратени во правец на Курск.
Минатата недела рускиот претседател Владимир Путин не ги призна, но не ги демантираше тврдењата дека војници од Северна Кореја пристигнале во Русија.
Заедно со борбите на фронтот, Фајненшл тајмс објави дека Украина и Русија водат прелиминарни преговори за ставање крај на ударите врз енергетската инфраструктура на двете земји.
Се забележува дека тие преговори, наводно, биле блиску до договор во август, но пропаднале поради упадот на украинските сили во Курск.
Весникот дознава дека Киев се обидува да ги продолжи преговорите со посредство на Катар.