Ким Џонг Ун, севернокорејскиот лидер, му го честиташе роденденот на рускиот претседател Владимир Путин, нарекувајќи го „најблизок другар“.
Честитајќи му го 72-от роденден на Путин, кој беше на 7 октомври, Ким Џонг Ун додаде дека односите меѓу нивните земји ќе бидат подигнати на ново ниво.
Од почетокот на руската инвазија на Украина во февруари 2022 година, врските меѓу Москва и Пјонгјанг се зајакнаа, што ги загрижува западните земји.
Севернокорејскиот лидер исто така рече дека ќе ги забрза чекорите за да ја направи земјата воена суперсила со нуклеарно оружје.
Повикувајќи се на севернокорејскиот државен медиум KCNA, Yonhap News објави дека Ким ги пофалил односите со Русија, велејќи дека тие станале „непобедливи и вечни“ по посетата на Путин на Пјонгјанг во јуни.
„Средбите и пријателските врски меѓу нас дополнително ќе ги зајакнат вечните, пријателски основи на Северна Кореја и Русија“, додаде тој.
Во јуни 2024 година, Путин и Ким потпишаа сеопфатен договор за взаемна помош меѓу двете земји во случај на „агресија“ врз една од тие две земји, нарекувајќи го „темелен документ“.
Не е јасно што би претставувало агресија.
Ким е обвинет за помагање на Русија во војната против Украина, снабдувајќи ѝ оружје во замена за економска и технолошка помош.
Се зголемуваат доказите дека Русија распоредува севернокорејски ракети во Украина.
Џефри Луис, директор на Центарот за студии за неширење на оружјето Џејмс Мартин, претходно изјави дека Ким и Путин „се обидуваат да ги ублажат ефектите од меѓународните санкции со создавање алтернативни мрежи за пријателство и партнерство надвор од дофатот на американските санкции“.
За време на посетата на Ким на Русија во септември 2023 година, Путин вети дека ќе и помогне на Северна Кореја да развие сателити.
Пјонгјанг претходно имаше неколку неуспешни лансирања.
Владата на Јужна Кореја во вторникот, 8 октомври, предупреди дека нејзината војска видела јасни знаци дека нејзиниот сосед, Северна Кореја, почнала да гради подморница на нуклеарен погон.
Цитирајќи ја Корејската разузнавачка агенција, пратеникот на владејачката партија Канг Дае-сик рече дека изградбата е во рана фаза и „потребна е дополнителна потврда дали е на нуклеарен погон“.